ماهر خلِّي بالك من ساهر
دحين أنا مستنية تجيب مفتاح السيارة الجديدة عشان تركنها عند باب البيت لما يجي العيد ونفرح بيها أيام العيد تقوم تشتري بسكليته وكمان مشرعها باللون الأهلاوي ؟ ايشبو اللون الأهلاوي مو جاب كأس الأبطال السنة دي وكاد العزال وبعدين تبغيني اشتري سيارة جديدة ليه؟ قالوالك مجنون والا جرى لعقلي حاجة، خليهم أول يصلحوا شوارعهم اللي بهدلتنا وبهدلت سياراتنا كل يوم والتاني وسياراتنا في الورش من تحت راس المطبات والحفر اللي موجودة في الشوارع والأزقة، أتمنى من كل قلبي أشوف شارع مسفلت زي الناس الا كله ترقيع في ترقيع والمسؤولين اللي في أمانة جدة ولا على بالهم معطينها طناش ولا في بالهم لأنهم يا ستي ما بيمشوا من الشوارع اللي نحنا بنمشي فيها لأنه شوارعهم اللي فيها قصورهم وفللهم مسفلتة زي المرمر لكن الغلابى اللي زي حالتنا تروح سياراتهم فطيس من تحت راس الحفر والمطبات، خليهم ينزلوا من مكاتبهم ويشوفوا كيف الشوارع حالتها بالبلا والبلا لاحقها، جدة كلها معدومة بأنواع الحفر والمطبات من شمالها لجنوبها ومن شرقها لغربها. دحين أنا جالسة بقول لك فين السيارة الجديدة انفلت زي السيخ على المطبات والأمانة وبدل ما تجيب السيارة جي داخل بالبسكليته لا وكمان حاطط وراها حوض زي الدباب أبو أربعه عجل ؟ أيوه يا ستي هدا عشان لما تبغي تركبي معايا تركبي في الحوض وأحسن من السيارة على الأقل تمشي وانت مطمن ولا أحد عندك لا عم ساهر ولا عم جاسر لكن لمن تكون في السيارة وماشي في أمان الله كل ما تمشي في شارع لقطك العم ساهر، تمشي 80 لقطوك، تمشي 70 لقطوك، منت عارف الشارع والا الكوبري دا ماشي على أي ملة، ما تشوف إلا فلاش الكاميرا لسعك بمخالفة ومنت عارف هيه المخالفة لك والا للي جنبك والا للي جنبك لانه الكاميرا بتعطي فلاش وبتصور الصف كله اللي ماشي يعني كل الصف اللي كان ماشي أتلسع بمخالفة وما توصل بيتك والا مكتبك إلا وجوالك يزغرط برسالة مبروك جاتك مخالفة سدد والا ما يصير معاك طيب لأن بعد كدا ما حتعرف تجدد استمارة ولا رخصة إلا لما تسدد، وشوفي عاد الغلابى اللي بتجيبهم المخالفات اللي بـ 30 ألف واللي 20 ألف والساعة بخمسة جنيه والحسابة بتحسب على قول أخينا عادل إمام، نحنا نلاقيها من فين؟ والا من فين؟ من أصحاب العقارات اللي قصموا ظهورنا ونفضوا جيوبنا والا من وزارة التجارة اللي ساكتة على اللي قاعد يصير في السوق من تلاعب في الأسعار وكل بقالة والا سوبرماركت والا حتى أصحاب السوبرماركات الكبيرة اللي بيسووا تخفيضاتهم في الجرايد وجالسين يلعبوا في سوق المواد الغذائية بكيفهم، والا نلقاها من أصحاب سيارات الفان اللي بيتفقوا مع أي سوبر فايزر موجود في مركز تجاري كبيير ويشتروا كميات كبيرة من المواد الغذائية ويلعبوا في الأسعار بكيفهم، عشان كدا بقول ياناس ياساهر خافوا الله في عباد الله، والله آخرتها حفرة ومتر قماش وقطنة.. ورمضان كريم وكل عام وحبايبي القراء بخير وصحة وسلامة. وعيشوا كتيييير تشوفوا كتيييير
مثل حجازي:
أعطي العيش لخبازه ولو أكل نصه.
